ಎಫ್ಡಿಎ ನೌಕರಿ ಆಮಿಷವೊಡ್ಡಿ 25 ಲಕ್ಷ ರೂ. ವಂಚನೆ! ದಂಪತಿ ಸೇರಿ ಮೂವರ ವಿರುದ್ಧ ವಿಧಾನಸೌಧ ಠಾಣೆಯಲ್ಲಿ ಎಫ್ಐಆರ್
ಬೆಂಗಳೂರು: ಪಿಎಸ್ಐ ನೇಮಕಾತಿಯಲ್ಲಿನ ಅಕ್ರಮ ರಾಷ್ಟ್ರಮಟ್ಟದಲ್ಲಿ ಕರ್ನಾಟಕ ಪೊಲೀಸ್ ಇಲಾಖೆಯ ಮಾನ ಹರಾಜು ಹಾಕಿದೆ. ಇದರ ಬೆನ್ನಲ್ಲೇ ಶಿಕ್ಷಕರ ಹದ್ದೆ ಹಗರಣ ಬಯಲಾಗಿ ರಾಜ್ಯದಲ್ಲಿ ಪ್ರತಿಭಾವಂತರಿಗೆ ಅನ್ಯಾಯ ಆಗುತ್ತಿರುವ ಹಾಗೂ ಭ್ರಷ್ಟ ವ್ಯವಸ್ಥೆ ಬಗ್ಗೆ ಆಕ್ರೋಶ ವ್ಯಕ್ತವಾಗಿದೆ.
ವಿಜಯಪುರ ಮೂಲದ ಪಂಡಿತ್ ಪರಮಾನಂದ ಚೌದ್ರಿ ವಂಚನೆಗೆ ಒಳಗಾದವರು. ಇವರು ಕೊಟ್ಟ ದೂರಿನ ಮೇರೆಗೆ ಮಾಗಡಿ ರಸ್ತೆ ಬ್ಯಾಡರಹಳ್ಳಿ ನಿವಾಸಿಗಳಾದ ಚಂದ್ರಕಲಾ ಬಾಯಿ, ಆಕೆಯ ಪತಿ ಗಂಗಾಧರ್ ನಾಯಕ್ ಮತ್ತು ಕಲಬುರಗಿ ಮೂಲದ ಶಶಿಕಾಂತ್ ಗಾನಟೆ ವಿರುದ್ಧ ವಿಧಾನಸೌಧ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲು ದಾಖಲಾಗಿದೆ.
ದೂರುದಾರ ಪಂಡಿತ್ ಪರಮಾನಂದ ಚೌದ್ರಿಗೆ ಸ್ನೇಹಿತ ನಾಗಪ್ಪ ಎಂಬಾತನ ಮೂಲಕ ಆರೋಪಿಗಳಾದ ಚಂದ್ರಕಲಾ ಬಾಯಿ, ಗಂಗಾಧರ್ ನಾಯಕ್ ಮತ್ತು ಶಶಿಕಾಂತ್ ಗನಾಟೆ ಪರಿಚಯ ಆಗಿದೆ. ಸರ್ಕಾರದ ಯಾವುದಾದರು ಇಲಾಖೆಯಲ್ಲಿ ಎಫ್ಡಿಎ ಕೆಲಸ ಕೊಡಿಸುವುದಾಗಿ ದೂರುದಾರನಿಗೆ ನಂಬಿಸಿದ್ದಾರೆ. ಆನಂತರ 2014 ರಿಂದ 2022ರ ವರೆಗೆ ಹಂತ ಹಂತವಾಗಿ ಪಂಡಿತ್ ಅವರಿಂದ 25 ಲಕ್ಷ ರೂಪಾಯಿಯನ್ನು ಆರೋಪಿಗಳು ಪಡೆದುಕೊಂಡಿದ್ದಾರೆ.
ಆದರೆ, ವರ್ಷಗಳೇ ಕಳೆದರೂ ಕೆಲಸ ಕೊಡಿಸಿಲ್ಲ. ಹಣ ವಾಪಸ್ ನೀಡುವಂತೆ ಪಂಡಿತ್ ಕೇಳಿದ್ದಾರೆ. 2015ರಲ್ಲಿ ಸಮಾಜ ಕಲ್ಯಾಣ ಇಲಾಖೆ ಎಫ್ಡಿಎ ಹುದ್ದೆಗೆ ನೇಮಕ ಮಾಡಿರುವ ಆದೇಶ ಪತ್ರವನ್ನು ಪಂಡಿತ್ ಮನೆಗೆ ಕಳುಹಿಸಿದ್ದಾರೆ.
ಪಂಡಿತ್ ಆ ನೇಮಕಾತಿ ಪತ್ರ ಹಿಡಿದು ಸಂಬಂಧಪಟ್ಟ ಇಲಾಖೆಗೆ ತೆರಳಿ ವಿಚಾರಿಸಿದಾಗ, ನಕಲಿ ಆದೇಶ ಪತ್ರ ಎಂಬುದು ಗೊತ್ತಾಗಿದೆ. ಹಣ ವಾಪಸ್ ನೀಡುವಂತೆ ಪಂಡಿತ್ ಆರೋಪಿಗಳನ್ನು ಕೇಳಿದಾಗ ಸಬೂಬು ಹೇಳಿ ಕಾಲ ದೂಡಿದ್ದಾರೆ. ಕೆಲಸವೂ ಇಲ್ಲದೆ ಹಣವೂ ಇಲ್ಲದೆ ನೊಂದ ಅಭ್ಯರ್ಥಿ ಇದೀಗ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.
