ಉಜ್ಜಯಿನಿಯಲ್ಲಿ ಮಹಾಕಾಲ ಲೋಕ ಇಂದು ಉದ್ಘಾಟನೆ; ಮೊದಲ ಹಂತದಲ್ಲಿ 900 ಮೀ. ಕಾರಿಡಾರ್ ಅಭಿವೃದ್ಧಿ
ನವದೆಹಲಿ: ಮಧ್ಯ ಪ್ರದೇಶದ ಉಜ್ಜಯಿನಿಯಲ್ಲಿರುವ ಮಹಾಕಾಲೇಶ್ವರ ದೇವಾಲಯ ಕಾರಿಡಾರ್ ಅಭಿವೃದ್ಧಿ ಭಾಗವಾದ 'ಶ್ರೀ ಮಹಾಕಾಲ ಲೋಕ'ದ ಮೊದಲ ಹಂತವನ್ನು ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ಉದ್ಘಾಟಿಸಲಿದ್ದಾರೆ. ಇದು 856 ಕೋಟಿ ರೂಪಾಯಿ ವೆಚ್ಚದ 900 ಮೀಟರ್ನ ಯೋಜನೆಯಾಗಿದೆ.
ಎರಡು ಹಂತಗಳು: ಎರಡು ಹಂತಗಳಲ್ಲಿ ಮಹಾಕಾಲ ಲೋಕ ಯೋಜನೆ ಅಭಿವೃದ್ಧಿ ಪಡಿಸಲು ಯೋಜಿಸಲಾಗಿದೆ. ಜಾಗತಿಕ ಮಟ್ಟದ ಅತ್ಯಾಧುನಿಕ ಸೌಲಭ್ಯಗಳನ್ನು ಒದಗಿಸಿ ಯಾತ್ರಿಗಳ ಅನುಭವವನ್ನು ಹೆಚ್ಚಿಸುವುದು ಇದರ ಗುರಿಯಾಗಿದೆ. ದೇವಸ್ಥಾನ ಸಂಕೀರ್ಣವನ್ನು ಏಳು ಪಟ್ಟು ಹಿಗ್ಗಿಸಲಾಗುತ್ತದೆ. ಪ್ರಸ್ತುತ ವರ್ಷಕ್ಕೆ ಸುಮಾರು 1.5 ಕೋಟಿ ಜನರು ಇಲ್ಲಿಗೆ ಭೇಟಿ ಕೊಡುತ್ತಿದ್ದು ಅದನ್ನು ದುಪ್ಪಟ್ಟುಗೊಳಿಸುವ ಗುರಿ ಹೊಂದಲಾಗಿದೆ.
ಪವಿತ್ರ ಕ್ಷೇತ್ರ
ದ್ವಾದಶ ಜ್ಯೋತಿರ್ಲಿಂಗಗಳ ಪೈಕಿ ಒಂದಾದ ಮಹಾಕಾಲೇಶ್ವರ ದೇಗುಲವು ಭೂಮಿ ಮೇಲಿನ ಅತ್ಯಂತ ಪವಿತ್ರ ಕ್ಷೇತ್ರಗಳಲ್ಲಿ ಒಂದೆಂದು ನಂಬಲಾಗಿದೆ. ಮಹಾಕಾಲೇಶ್ವರ ದೇವಸ್ಥಾನಕ್ಕೆ ಶ್ರಾವಣ ಮಾಸ ಮತ್ತು ಮಹಾಶಿವರಾತ್ರಿಯಂದು ಲಕ್ಷಾಂತರ ಜನರು ಭೇಟಿ ನೀಡುತ್ತಾರೆ. ಇಲ್ಲಿ ಪ್ರತಿ 12 ವರ್ಷಕ್ಕೊಮ್ಮೆ ಸಿಂಹಸ್ಥ ಕುಂಭ ಮೇಳ ನಡೆಯುತ್ತದೆ. ಹಿಂದಿನ ಕುಂಭಮೇಳವು 2016ರಲ್ಲಿ ನಡೆದಿತ್ತು.
