ರಾಜ್ಯದಲ್ಲಿ `ಬಂಡವಾಳ ಬಂಪರ್' : 11 ಕೈಗಾರಿಕಾ ಕ್ಲಸ್ಟರ್ ಗುರುತು, 9 ವರ್ಷಗಳಲ್ಲಿ 9 ಲಕ್ಷ ಉದ್ಯೋಗ ಸೃಷ್ಟಿ
ಬೆಂಗಳೂರು : ರಾಜ್ಯದಲ್ಲಿ 11 ಕೈಗಾರಿಕಾ ಕ್ಲಸ್ಟರ್ ಗಳನ್ನು ಗುರುತಿಸಲಾಗಿದ್ದು, ಇವುಗಳಿಂದ ಮುಂದಿನ ಒಂಬತ್ತು ವರ್ಷಗಳಲ್ಲಿ 9 ಲಕ್ಷ ಉದ್ಯೋಗಗಳು ( Jobs ) ಸೃಷ್ಟಿಯಾಗಲಿವೆ ಎಂದು ಐಟಿ-ಬಿಟಿ ಸಚಿವ ಡಾ.ಸಿ ಎನ್ ಅಶ್ವತ್ಥನಾರಾಯಣಹೇಳಿದ್ದಾರೆ.
ಬೆಂಗಳೂರಿನಲ್ಲಿ ಬುಧವಾರ ಆರಂಭವಾದ ಜಾಗತಿಕ ಹೂಡಿಕೆದಾರರ ಸಮಾವೇಶದಲ್ಲಿ ಅವರು 'ಜಾಗತೀಕರಣ ಮತ್ತು ಭಾರತಕ್ಕೆ ಇರುವ ಅವಕಾಶಗಳು' ಗೋಷ್ಠಿಯಲ್ಲಿ ಮಾತನಾಡಿ, ಕರ್ನಾಟಕದಲ್ಲಿ ಹೂಡಿಕೆ ಮಾಡುವ ಉದ್ಯಮಿಗಳಿಗೆ ಅವರ ಬಂಡವಾಳದ ಶೇ. 25ರಿಂದ 30ರಷ್ಟನ್ನು ಸಬ್ಸಿಡಿಯಾಗಿ ಕೊಡಲಾಗುತ್ತಿದೆ. ಇದು ದೇಶದಲ್ಲೇ ಅತ್ಯಧಿಕವಾಗಿದೆ ಎಂದು ಅವರು ವಿವರಿಸಿದರು.
ರಾಮನಗರದಲ್ಲಿ ವಿದ್ಯುತ್ ಚಾಲಿತ ವಾಹನ, ಧಾರವಾಡದಲ್ಲಿ ಇಎಸ್ಜಿಎಂ, ಕೊಪ್ಪಳದಲ್ಲಿ ಆಟಿಕೆ, ಯಾದಗಿರಿಯಲ್ಲಿ ಔಷಧ ವಲಯದ ಕ್ಲಸ್ಟರುಗಳು ಅಸ್ತಿತ್ವಕ್ಕೆ ಬರಲಿವೆ. ಇವು ಕರ್ನಾಟಕದ ಸಮತೋಲಿತ ಬೆಳವಣಿಗೆಗೆ ದಾರಿ ಮಾಡಿಕೊಡಲಿವೆ ಎಂದು ಅವರು ಹೇಳಿದರು.
ದೇಶದಲ್ಲಿ ತಯಾರಾಗುತ್ತಿರುವ ಮೊಬೈಲುಗಳಲ್ಲಿ ಶೇ.97ರಷ್ಟು ಇಲ್ಲೇ ತಯಾರಾಗುತ್ತಿದೆ. ರಾಜ್ಯವು ಎಲ್ಲ ಆಧುನಿಕ ಉದ್ಯಮಗಳಿಗೆ ಸಂಬಂಧಿಸಿದಂತೆಯೂ ಸಮರ್ಥ ನೀತಿಗಳನ್ನು ರೂಪಿಸಿದೆ ಎಂದು ಅವರು ಪ್ರತಿಪಾದಿಸಿದರು.
ಗೋಷ್ಠಿಯಲ್ಲಿ ಗ್ಲೋಬಲ್ ಗವರ್ನೆನ್ಸ್ ಫೋರಂನ ಕಾರ್ಯ ನಿರ್ವಾಹಕ ನಿರ್ದೇಶಕ ಆಗಸ್ಟೋ ಲೋಪೆಜ್ ಕ್ಲಾರೋಸ್ ಮತ್ತು ಅಮೆರಿಕದ ಸ್ಟ್ಯಾನ್ಫೋರ್ಡ್ ಯೂನಿವರ್ಸಿಟಿಯ ಡಾ.ಅಮಿತ್ ಕಪೂರ್ ಇದ್ದರು.
