ಶಾಲು ತಂದಿದ್ದೇನೆ, ಇಲ್ಲಿಯೇ ಮಲಗುತ್ತೇನೆ : ಪರಿಷತ್‍ನಲ್ಲಿ ಕೋಲಾಹಲ

ಇವತ್ತು ನನಗೆ ಸಮಾಧಾನಕರ ಉತ್ತರ ಸಿಗಬೇಕು. ಇಲ್ಲವಾದರೆ ಈಗಾಗಲೇ ನಾನು ಶಾಲು ತಂದಿದ್ದೇನೆ , ಇಲ್ಲಿಯೇ ಮಲಗುತ್ತೇನೆ. ನನಗೆ ನಿಖರ ಉತ್ತರ ಬೇಕು. ಇದು ನನ್ನ ಕೊನೆಯ ಹೋರಾಟ ಎಂದು ಹೇಳಿದರು.

ಕಂದಾಯ ಸಚಿವ ಆರ್.ಅಶೋಕ್ ಉತ್ತರಿಸಿ, ಡಿಮ್ಡ್ ಫಾರೆಸ್ಟ್ ಎಂಬುದೆ ಅವೈಜ್ಞಾನಿಕ. ಹಿಂದೆ ಸರ್ಕಾರಿ ಜಾಗವನ್ನು ಆಗಿನ ಜಿಲ್ಲಾಧಿಕಾರಿಗಳು ಅರಣ್ಯ ಇಲಾಖೆಗೆ ಬರೆದುಕೊಟ್ಟಿದ್ದಾರೆ. ರಾಜ್ಯದಲ್ಲಿ ಸುಮಾರು 10.83 ಲಕ್ಷ ಎಕರೆ ಡಿಮ್ಡ್ ಫಾರೆಸ್ಟ್ ಇದೆ . ಅದರಲ್ಲಿ ರೈತರು ಉಳುಮೆ ಮಾಡುತ್ತಿದ್ದಾರೆ.

ಸರ್ಕಾರ ಮನೆ ಕಟ್ಟಿಕೊಳ್ಳಲು 94 ಸಿ ಅಡಿ ಅನುಮತಿ ನೀಡಿದೆ. ಆದರೆ ಒಮ್ಮೆ ಅರಣ್ಯ ಇಲಾಖೆಗೆ ಭೂಮಿ ಸೇರಿದರೆ ವಾಪಾಸ್ ತೆಗೆದುಕೊಳ್ಳುವುದು ಬಹಳ ಕಷ್ಟ. ಚೆನೈನಲ್ಲಿ ಸುಪ್ರೀಂಕೋರ್ಟ್‍ನಲ್ಲಿರುವ ಪೀಠಕ್ಕೆ ಪ್ರಮಾಣ ಪತ್ರ ಸಲ್ಲಿಸಿಡಿಮ್ಡ್ ಫಾರೆಸ್ಟ್ ನಲ್ಲಿ ಇರುವವರನ್ನು ಒಕ್ಕಲೆಬ್ಬಿಸದಂತೆ ಕ್ರಮ ಕೈಗೊಳ್ಳುತ್ತೇವೆ ಎಂದು ಹೇಳಿದರು.

ನಾನು ಸಚಿವನಾದ ಮೇಲೆ ದಿನ ಬಿಟ್ಟು ದಿನ ಅರಣ್ಯ ಇಲಾಖೆಯೊಂದಿಗೆ ಸಭೆ ನಡೆಸುತ್ತಿದ್ದೇನೆ. 10 ಲಕ್ಷ ಹೆಕ್ಟೇರ್‍ನಲ್ಲಿ 6.64 ಲಕ್ಷ ಹೆಕ್ಟೇರ್‍ಅನ್ನು ಕಂದಾಯ ಇಲಾಖೆಗೆ ಬಿಟ್ಟುಕೊಡಲು ಅರಣ್ಯ ಇಲಾಖೆ ಒಪ್ಪಿಕೊಂಡಿದೆ. ರೈತರಿಗೆ ಮನೆ ಕಟ್ಟಿಕೊಂಡವರಿಗೆ ಭೂಮಿ ಕೊಡಿಸುತ್ತೇವೆ ಎಂದರು.

ಪ್ರತಾಪ್‍ಚಂದ್ರ ಶೆಟ್ಟಿ, ಈ ರೀತಿಯ ಉತ್ತರಗಳನ್ನು ಮೂರ್ನಾಲ್ಕು ಸಚಿವರಿಂದ ಕೇಳಿಕೊಂಡು ಬಂದಿದ್ದೇವೆ. ಕೇಳಿ ಕೇಳಿ ಸಾಕಾಗಿದೆ. ಸರ್ಕಾರವೇ 94 ಸಿ ಫಾರಂ ಪ್ರಕಾರ ಅನುಮತಿ ನೀಡಿದೆ, ಮತ್ತೆ ಮನೆ ಕಟ್ಟಿಕೊಳ್ಳಲು ತಡೆಯುತ್ತಾರೆ ಎಂದರೆ ಹೇಗೆ. ನೀವೆ ಕೊಟ್ಟಿರುವ 94 ಸಿ ಫಾರಂನ ಫಲಾನುಭವಿಗಳಿಗೆ ಹಕ್ಕು ಪತ್ರ ನೀಡದಿದ್ದರೆ ಹೇಗೆ ಎಂದು ಪ್ರಶ್ನಿಸಿದರು.

ಕಂದಾಯ ಸಚಿವರು ಹಿಂದೆ ಏನಾಗಿತ್ತು ಗೊತ್ತಿಲ್ಲ. ಆದರೆ ನಾನು ಸಚಿವನಾದ ಮೇಲೆ ಅಧಿಕೃತವಾಗಿ ಸಭೆ ನಡೆಸಿದ್ದೇನೆ. ಅರಣ್ಯ ಇಲಾಖೆ ಭೂಮಿ ಬಿಟ್ಟು ಕೊಡುವುದಾಗಿ ಲಿಖಿತವಾಗಿ ಹೇಳಿದೆ. ಅದನ್ನು ಆಧರಿಸಿ ಸುಪ್ರಿಂಕೋರ್ಟ್‍ಗೆ ಪ್ರಮಾಣ ಪತ್ರ ಸಲ್ಲಿಸುತ್ತೇವೆ. ಅರಣ್ಯ ಇಲಾಖೆಯ ಲಿಖಿತ ಹೇಳಿಕೆಯನ್ನು ಕಾನೂನು ಇಲಾಖೆ ಪರಿಶೀಲನೆ ನಡೆಸುತ್ತಿದೆ ಎಂದು ಹೇಳಿದರು.

94 ಸಿ ನೀಡಿರುವುದು ಯಾರು ಕಂದಾಯ ಇಲಾಖೆ ತಾನೇ, ಅದನ್ನು ಪರಿಗಣಿಸಿ ಹಕ್ಕು ಪತ್ರ ನೀಡುವ ಕುರಿತು ನನಗೆ ಸ್ಪಷ್ಟ ಭರವಸೆ ಬೇಕು ಎಂದು ಪ್ರತಾಪ್‍ಚಂದ್ರಶೆಟ್ಟಿ ಪಟ್ಟು ಹಿಡಿದು ಧರಣಿಗೆ ಮುಂದಾದರು.

ಈ ಕುರಿತು ಚರ್ಚೆ ನಡೆಸುತ್ತೇನೆ ಎಂದು ಸಚಿವ ಅಶೋಕ್ ಹೇಳಿದಾಗ ಮಾತುಕತೆ ನಡೆಸಲು ಇದೇನು ಬೀಗತನವೇ, ನಿಖರ ಉತ್ತರ ನೀಡಿ ಎಂದು ಪ್ರತಾಪ್ ಚಂದ್ರ ಶೆಟ್ಟಿ ಖಾರವಾಗಿ ಹೇಳಿದರು.

ಇದು ಅವರಿಗೆ ಕೊನೆಯ ಅಧಿವೇಶನವಂತೆ. ಹಾಗಾಗಿ ಮಾತನಾಡಲಿ ಬಿಡಿ ಎಂದು ಆರ್.ಅಶೋಕ್ ತಮ್ಮ ಸಹದ್ಯೋಗಿಗಳಿಗೆ ಹೇಳಿದಾಗ, ಸಚಿವರಾದ ಸಿ.ಸಿ.ಪಾಟೀಲï, ಸುನೀಲ್ ಕುಮಾರ್ ಅವರು ಪ್ರತಾಪ್ ಚಂದ್ರ ಶೆಟ್ಟಿ ಅವರ ಹಠಕ್ಕೆ ಅಸಂತೋಷ ವ್ಯಕ್ತ ಪಡಿಸಿದರು. ನನಗೆ ಯಾರ ಭಿಕ್ಷೆಯೂ ಬೇಡ ಎಂದು ಪ್ರತಾಪ್ ಚಂದ್ರ ಶೆಟ್ಟಿ ತಿರುಗೇಟು ನೀಡಿದರು. ಈ ಸಂದರ್ಭದಲ್ಲಿ ಆಡಳಿತ ಪಕ್ಷದ ಸಚಿವರು ಮತ್ತು ಸದಸ್ಯರ ನಡುವೆ ಮಾತಿನ ಚಕಮಕಿ ನಡೆಯಿತು.

ಇದು ಸರಳವಾದ ಸಮಸ್ಯೆ ಸುಲಭವಾಗಿ ಬಗೆ ಹರಿಸಬಹುದು. ಸರ್ಕಾರ ನಿಖರ ಉತ್ತರ ಹೇಳಲಿ ಎಂದು ವಿರೋಧ ಪಕ್ಷದ ನಾಯಕರಾದ ಎಸ್.ಆರ್.ಪಾಟೀಲï, ಬಿ.ಕೆ.ಹರಿಪ್ರಸಾದ್, ಎಂ.ನಾರಾಯಣಸ್ವಾಮಿ ಆಗ್ರಹಿಸಿದರು.

ಇದರಲ್ಲಿ ರಾಜಕಾರಣ ಮಾಡುವುದು ಬೇಡ ಎಂದು ನಾವು ಸುಮ್ಮನಿದ್ದೇವೆ. ನೀವು ರಾಜಕಾರಣ ಮಾಡಿದರೆ ನಾವು ಮಾಡುತ್ತೇವೆ. ಡಿಮ್ಡ್ ಫಾರೆಸ್ಟ್ ನಿಮ್ಮ ಸರ್ಕಾರದ ಪಾಪದ ಕೂಸು. ಅದನ್ನು ಸರಿಪಡಿಸಲು ನಮ್ಮ ಸರ್ಕಾರ ಪ್ರಯತ್ನಿಸುತ್ತಿದೆ ಎಂದು ಸಚಿವ ಸುನೀಲ್ ಕುಮಾರ್ ವಾಗ್ದಾಳಿ ನಡೆಸಿದರು. ಮತ್ತೆ ಮಾತಿನ ಚಕಮಕಿ ನಡೆಯಿತು.

ಈ ಹಂತದಲ್ಲಿ ಸಭಾಪತಿ ಬಸವರಾಜ ಹೊರಟ್ಟಿ ಅವರು, ಈ ವಿಷಯವನ್ನು ಅರ್ಧ ಗಂಟೆ ಚರ್ಚೆಗೆ ಕಾಲಾವಕಾಶ ನೀಡುವುದಾಗಿ ಭರವಸೆ ನೀಡಿ ವಿಷಯ ಅಂತ್ಯಗೊಳಿಸಿದರು.