ಚಾಲಕನ ನಿಂದನೆ; ಭಾರತೀಯ ಮೂಲದ ವ್ಯಕ್ತಿಗೆ ಜೈಲು ಶಿಕ್ಷೆ
ಸಿಂಗಪುರ: ಚೀನಾ ಮೂಲದ ಟ್ಯಾಕ್ಸಿ ಚಾಲಕನೊಂದಿಗೆ ಅಸಭ್ಯವಾಗಿ ವರ್ತಿಸಿ, ಜನಾಂಗೀಯ ನಿಂದನೆ ಮಾಡಿದ ಆರೋಪಕ್ಕಾಗಿ ಭಾರತೀಯ ಮೂಲದ ಸಿಂಗಪುರದ ವ್ಯಕ್ತಿಗೆ ಹದಿನೇಳು ದಿನಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ ಎಂದು ಸ್ಥಳೀಯ ಮಾಧ್ಯಮವೊಂದು ವರದಿ ಮಾಡಿದೆ.
ಸಹಾಯನಾಥನ್ ಆಂಥೊನಿ (48) ಜೈಲು ಶಿಕ್ಷೆಗೆ ಗುರಿಯಾದ ವ್ಯಕ್ತಿ. ಈತ ತಾನು ಮದ್ಯಪಾನ ಮಾಡಿ ಸಾರ್ವಜನಿಕವಾಗಿ ಚಾಲಕ ಟಾನ್‌ ಟೇಕ್‌ ಹಾಕ್‌ನನ್ನು ನಿಂದಿಸಿದ್ದಾಗಿ ಒಪ್ಪಿಕೊಂಡಿರುವುದಾಗಿ 'ದಿ ಸ್ಟ್ರೇಟ್ಸ್‌ ಟೈಮ್ಸ್‌' ವರದಿ ಮಾಡಿದೆ.
ಆಂಥೊನಿ ಎರಡು ಬಾರಿ ಚಾಲಕನಿಗೆ ಕಿರುಕುಳ ನೀಡಿದ್ದು ಸಾಬೀತಾಗಿರುವ ಹಿನ್ನೆಲೆಯಲ್ಲಿ, ನ್ಯಾಯಾಲಯ ಎರಡು ವಾರ ಮತ್ತು ಮೂರು ದಿನಗಳ ಜೈಲು ಶಿಕ್ಷೆ ವಿಧಿಸಿದೆ.
ಕಳೆದ ಅಕ್ಟೋಬರ್ 30ರಂದು ಸಹಾಯನಾಥನ್ ಅವರು ತನ್ನ ಪತ್ನಿಯೊಂದಿಗೆ ಟ್ಯಾಕ್ಸಿಯಲ್ಲಿ ಮಾಲ್‌ಗೆ ಹೋಗುವ ವೇಳೆ, ಚಾಲಕನಿಗೆ ಹತ್ತಿರದ ಮಾರ್ಗದಲ್ಲಿ ಕರೆದೊಯ್ಯುವಂತೆ ತಿಳಿಸಿದ್ದರು. ಇದಕ್ಕೆ ಸ್ಪಂದಿಸದಿದ್ದಾಗ ಚಾಲಕನನ್ನು ಅಸಭ್ಯ ಪದಗಳಿಂದ ನಿಂದಿಸಿದ್ದರು. ಈ ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿ, ಶಿಕ್ಷೆಯಲ್ಲಿ ಕೊನೆಯಾಗಿದೆ.
