ಕಾರುಗಳಿಗೆ ಏಕರೂಪಿ ತೆರಿಗೆ: ಭಾರ್ಗವ ಅಸಮಾಧಾನ
ನವದೆಹಲಿ: ಎಲ್ಲ ಬಗೆಯ ಕಾರುಗಳಿಗೂ ಒಂದೇ ಪ್ರಮಾಣದ ತೆರಿಗೆ ವಿಧಿಸುವುದು ಆಟೊಮೊಬೈಲ್ ಉದ್ಯಮದ ಬೆಳವಣಿಗೆಗೆ ಪೂರಕವಲ್ಲ ಎಂದು ಮಾರುತಿ ಸುಜುಕಿ ಇಂಡಿಯಾ ಕಂಪನಿಯ ಅಧ್ಯಕ್ಷ ಆರ್‌.ಸಿ. ಭಾರ್ಗವ ಹೇಳಿದ್ದಾರೆ.
ತಯಾರಿಕಾ ವಲಯ ಇನ್ನಷ್ಟು ವೇಗವಾಗಿ ಬೆಳೆದರೆ ದೇಶದ ಒಟ್ಟು ಆರ್ಥಿಕ ಬೆಳವಣಿಗೆ ಹೆಚ್ಚಾಗಬಹುದು.
ಆಟೊಮೊಬೈಲ್ ಉದ್ಯಮ ಆರೋಗ್ಯಕರ ಬೆಳವಣಿಗೆ ಕಾಣಬೇಕು ಎಂದಾದರೆ ಕಾರು ಖರೀದಿಸುವವರ ಸಂಖ್ಯೆಯಲ್ಲಿ ಸ್ಥಿರವಾದ ಏರಿಕೆ ಇರಬೇಕು. ದೇಶದ ಸಣ್ಣ ಕಾರುಗಳ ಮಾರಾಟದಲ್ಲಿ ಬೆಳವಣಿಗೆ ಕಾಣಿಸುತ್ತಿಲ್ಲ. ದೊಡ್ಡ ಕಾರುಗಳ ಮಾರಾಟದಲ್ಲಷ್ಟೇ ಬೆಳವಣಿಗೆ ಇದೆ ಎಂದು ಭಾರ್ಗವ ಅವರು ಸೋಮವಾರ ಹೇಳಿದ್ದಾರೆ.
ಆಟೊಮೊಬೈಲ್ ಉದ್ಯಮದ ಮೇಲೆ ವಿಧಿಸುತ್ತಿರುವ ಭಾರಿ ಪ್ರಮಾಣದ ತೆರಿಗೆಯು ಉದ್ಯಮದ ಬೆಳವಣಿಗೆಯ ಮೇಲೆ ಪರಿಣಾಮ ಬೀರಿದೆ ಎಂದು ಅವರು ಕಿಡಿ ಕಾರಿದ್ದಾರೆ.
