ಸಿಂಬು ನಟನೆಯ ಮಾನಾಡು ಚಿತ್ರ ಬ್ಯಾನ್ ಮಾಡುವಂತೆ ಬಿಜೆಪಿ ಆಗ್ರಹ: ಈ ಸಿನಿಮಾದಲ್ಲಿ ಅಂಥದ್ದೇನಿದೆ?
ಚೆನ್ನೈ: ಸೌತ್ ಸೂಪರ್ ಸ್ಟಾರ್ ಸಿಂಬು ಅಭಿನಯದ ಟೈಮ್ ಲೂಪ್ ಥ್ರಿಲ್ಲರ್ 'ಮಾನಾಡು' ಚಿತ್ರ ಕಾಲಿವುಡ್ ಗಲ್ಲಾ ಪೆಟ್ಟಿಗೆಯಲ್ಲಿ ಧೂಳೆಬ್ಬಿಸುತ್ತಿದೆ. ಇದೊಂದು ರಾಜಕೀಯ ಸೈನ್ಸ್ಫಿಕ್ಸನ್ ಸಿನಿಮಾ ಆಗಿದ್ದು, ಬಿಡುಗಡೆ ದಿನವೇ ಕೋಟಿ ಕೋಟಿ ಹಣ ಬಾಚಿಕೊಂಡು ಭರ್ಜರಿ ಪ್ರದರ್ಶನ ಕಾಣುತ್ತಿದೆ.
ಮಾನಾಡು ಚಿತ್ರವು ಮುಸ್ಲಿಂ ಯುವಕನೊಬ್ಬನ ಸುತ್ತ ಸುತ್ತುತ್ತದೆ, ಮುಖ್ಯಮಂತ್ರಿಯ ಹತ್ಯೆಗೆ ಮುಸ್ಲಿಂ ವ್ಯಕ್ತಿಯನ್ನು ಸಿಕ್ಕಿಹಾಕಿಸುವ ಸಂಚನ್ನು ಸಹಾಯಕ ಕಮಿಷನರ್ ತಡೆಯಲು ಪ್ರಯತ್ನಿಸುವುದೇ ಈ ಚಿತ್ರದ ಕಥಾಹಂದರ. ಇದೀಗ ಈ ಚಿತ್ರದ ವಿರುದ್ಧ ಬಿಜೆಪಿ ಅಲ್ಪಸಂಖ್ಯಾತರ ತಂಡದ ರಾಷ್ಟ್ರೀಯ ಕಾರ್ಯದರ್ಶಿ ವೆಲ್ಲೋರ್ ಇಬ್ರಾಹಿಂದ ಮಾತನಾಡಿದ್ದು, ಚಿತ್ರವನ್ನು ಬ್ಯಾನ್ ಮಾಡುವಂತೆ ಆಗ್ರಹಿಸಿದ್ದಾರೆ.
ಚಿತ್ರದಲ್ಲಿ ಪೊಲೀಸರನ್ನು ಉಗ್ರರು ಎಂದು ಬಿಂಬಿಸಲಾಗಿದೆ. ಕೊಯಮತ್ತೂರು ಬಾಂಬ್ ಸ್ಫೋಟದ ಬಗ್ಗೆ ತಪ್ಪು ಮಾಹಿತಿಯನ್ನು ಹರಡಲಾಗುತ್ತಿದೆ. ಅಲ್ಲದೆ, ಹಿಂದು-ಮುಸ್ಲಿಂ ಒಗ್ಗಟ್ಟಿಗೆ ತೊಡಕಾಗಿದೆ. ಚಿತ್ರವನ್ನು ವೈಭವೀಕರಿಸಲು ಧಾರ್ಮಿಕ ಸಂಕೇತವನ್ನು ಬಳಸಿಕೊಳ್ಳಲಾಗಿದ್ದು, ಇದು ಹಿಂಸೆ ಪ್ರಚೋದಿಸುತ್ತದೆ. ಸಿಎಂ ಸ್ಟಾಲಿನ್ ಅವರು ಮಧ್ಯಸ್ಥಿಕೆ ವಹಿಸಬೇಕು. ಮಾನಾಡು ಚಿತ್ರದ ವಿವಾದಾತ್ಮಕ ದೃಶ್ಯವನ್ನು ತೆಗೆಸಬೇಕೆಂದು ಕೋರಿದ್ದಾರೆ.
ಸರ್ಕಾರ ಮಾನಾಡು ಚಿತ್ರವನ್ನು ಬ್ಯಾನ್ ಮಾಡಬೇಕು. ಬ್ಯಾನ್ ಮಾಡದಿದ್ದರೆ ಚಿತ್ರದ ವಿರುದ್ಧ ಬಿಜೆಪಿ ಹೋರಾಟ ನಡೆಸಲಿದೆ. ನಿರ್ದೇಶಕರ ಮನೆಯ ಮುಂದೆ ಆದಷ್ಟು ಬೇಗ ಪ್ರತಿಭಟನೆ ನಡೆಸಲಾಗುವುದು. ತಮಿಳುನಾಡಿನಲ್ಲಿ ಕಾನೂನು ಸುವ್ಯವಸ್ಥೆ ಕೆಟ್ಟದಾಗಿದೆ. ಬಿಜೆಪಿ ದೂರಿನ ಮೇಲೆ ಪೊಲೀಸರು ಕ್ರಮ ಕೈಗೊಂಡಿಲ್ಲ ಎಂದು ಇಬ್ರಾಹಿಂ ಆರೋಪ ಮಾಡಿದ್ದಾರೆ.
