ನೈರುತ್ಯ ರೈಲ್ವೆ ಸಾಧನೆ 6,214.85 ಕೋಟಿ ಆದಾಯ ಗಳಿಕೆ

ಈಗಾಗಲೇ ತನ್ನ ಸೇವೆಯ ಮೂಲಕ ಹೆಸರು ಮಾಡಿರುವ ನೈರುತ್ಯ ರೈಲ್ವೆ ಇದೀಗ ತನ್ನ ಸೇವೆಗೆ ಪ್ರತಿಯಾಗಿ ಬಂದ ಆದಾಯದಲ್ಲೂ ಉತ್ತಮ ಸಾಧನೆ ಗೈದಿದೆ. ಅದರಲ್ಲೂ ಈ ವರ್ಷ ತನ್ನ ವ್ಯಾಪ್ತಿಯಲ್ಲಿ 2022-23 ರ ಸಾಲಿನಲ್ಲಿ 750 ರಿಂದ 800 ರೂಟ್ ಕಿಲೋ ಮೀಟರ್ ರೈಲು ಮಾರ್ಗವನ್ನು ವಿದ್ಯುದೀಕರಣ ಮಾಡುವ ಗುರಿ ಮೂಲಕ 2030 ರೊಳಗೆ ದೇಶದ ರೈಲುಗಳನ್ನು ಪರಿಸರ ಸ್ನೇಹಿಯಾಗಿಸುವ ಗುರಿಗಾಗಿ ಮತ್ತೊಂದು ಹೆಜ್ಜೆ ಮುಂದೆ ಇಟ್ಟಿದೆ.

ಈಗಾಗಲೇ 2021-22 ನೇ ಸಾಲಿನಲ್ಲಿ 511.7 ರೂಟ್ ಕಿ.ಮೀ ರೈಲು ಮಾರ್ಗವನ್ನು ವಿದ್ಯುದೀಕರಣ ಮಾಡಲಾಗಿದೆ. 2024 ರ ಮಾರ್ಚ್ ಅಂತ್ಯಕ್ಕೆ ನೈರುತ್ಯ ರೈಲ್ವೆ ವಲಯ ವ್ಯಾಪ್ತಿಯ ಎಲ್ಲ ರೈಲು ಮಾರ್ಗವನ್ನು ಸಂಪೂರ್ಣ ವಿದ್ಯುದೀಕರಣ ಮಾಡುವುದು, ದಾವಣಗೆರೆ-ಚಿತ್ರದುರ್ಗ-ತುಮಕೂರು ಹಾಗೂ ರಾಣೆಬೆನ್ನೂರು-ಶಿಕಾರಿಪುರ-ಶಿವಮೊಗ್ಗ ಮಾರ್ಗಕ್ಕೆ ಹೊಸ ರೈಲು ಮಾರ್ಗ ಕಾಮಗಾರಿ ಆರಂಭಿಸಲಾಗುವುದು, ಹುಬ್ಬಳ್ಳಿ-ಬೆಂಗಳೂರು ನಡುವಿನ 50 ಕಿ.ಮೀ ಸೇರಿದಂತೆ ಒಟ್ಟು 250 ಕಿ.ಮೀ ಮಾರ್ಗವನ್ನು ಡಬ್ಲಿಂಗ್ ಕಾಮಗಾರಿ ಆದಷ್ಟು ಬೇಗ ಕೈಗೊಳ್ಳಲಾಗುವುದು ಎಂದು ನೈರುತ್ಯ ರೈಲ್ವೆ ವಲಯ ಮಹಾಪ್ರಬಂಧಕ ಸಂಜೀವ್ ಕಿಶೋರ್ ಹೇಳಿದ್ದಾರೆ.

ಈಗಾಗಲೇ ತಿಳಿಸಿದಂತೆ ನೈರುತ್ಯ ರೈಲ್ವೆ 2021-22 ನೇ ಆರ್ಥಿಕ ವರ್ಷದಲ್ಲಿ ಎಲ್ಲ ಮೂಲಗಳಿಂದ 6.214.85 ಕೋಟಿ ರೂ ಆದಾಯಗಳಿಸಿದೆ. ಅದರಲ್ಲಿ ಸರಕು ಸಾಗಾಣಿಕೆಯಿಂದ 4.160.04 ಕೋಟಿ ರೂಪಾಯಿ, ಪ್ರಯಾಣಿಕರಿಂದ 1.575.31 ಕೋಟಿ ರೂಪಾಯಿ, ಪಾರ್ಸೆಲ್ ಸಾಗಾಣೆಯಿಂದ 122.18 ಕೋಟಿ ರೂಪಾಯಿ, ಗುಜರಿ ವಸ್ತುಗಳ ಮಾರಾಟದಿಂದ 138.04 ಕೋಟಿ ರೂಪಾಯಿ ಆದಾಯ ಗಳಿಸಿ ಉತ್ತಮ ಸಾಧನೆ ಮಾಡಿದೆ. 

ಇನ್ನು ಸಮಯಪಾಲನೆಯಲ್ಲಿ ಶೇ.94.26 ರಷ್ಟು ಗುರಿ ಸಾಧನೆ ಮಾಡಿರುವ ನೈರುತ್ಯ ರೈಲ್ವೆ, ಭಾರತೀಯ ರೈಲ್ವೆಯ 16 ವಲಯದಲ್ಲಿ 4 ನೇ ಸ್ಥಾನ ಪಡೆದುಕೊಂಡಿದೆ. ಒಟ್ಟಿನಲ್ಲಿ ತನ್ನ ಕೆಲಸಗಳಿಂದಲೇ ಸುದ್ದಿ ಯಾಗುತ್ತಿರುವ ನೈರುತ್ಯ ರೈಲ್ವೆ ಇದೀಗ 2021-22 ನೇ ಆರ್ಥಿಕ ವರ್ಷದಲ್ಲಿ ಕಳೆದ ಬಾರಿಗಿಂತ ಶೇ.27.34 ರಷ್ಟು ಹೆಚ್ಚಿನ ಆದಾಯದ ಜೊತೆಗೆ ಈ ವರ್ಷ 750-800 ರೂಟ್ ಕಿ.ಮೀ ವಿದ್ಯುದೀಕರಣ ಮಾಡುವ ಗುರಿ ಮೂಲಕ  ಪರಿಸರ ಸಂರಕ್ಷಣೆ ಕಾಳಜಿ ವಹಿಸಲು ಮುಂದಾಗಿರುವುದು ವಿಶೇಷವಾಗಿದೆ.

ನವೀನ ಸೋಲಾರಗೊಪ್ಪ ನೈನ್ ಲೈವ್ ನ್ಯೂಸ್ ಹುಬ್ಬಳ್ಳಿ