ನ್ಯೂಸ್ ಚಾನೆಲ್ ಸ್ಟುಡಿಯೋಗೆ ನುಗ್ಗಿದ ತಾಲಿಬಾನಿಗಳು! ಆಯಂಕರ್ಗೆ ಗನ್ ತೋರಿಸಿ ಬಲವಂತವಾಗಿ ಸುದ್ದಿ ಓದಿಸಿದ್ರು
ಕಾಬೂಲ್: ಆಫ್ಘಾನಿಸ್ತಾನದಲ್ಲಿ ಅಟ್ಟಹಾಸ ಮೆರೆಯುತ್ತಿರುವ ತಾಲಿಬಾನಿಗಳು, ಸುದ್ದಿ ವಾಹಿನಿಯೊಂದರ ಕಚೇರಿಗೂ ನುಗ್ಗಿ ಆಯಂಕರ್ ಹಿಂಬದಿ ಗನ್ ಹಿಡಿದು ನಿಂತು ತಮ್ಮ ಪರವಾಗಿ ಸುದ್ದಿ ಓದಿಸಿದ್ದಾರೆ. ಈ ದೃಶ್ಯ ವೈರಲ್ ಆಗಿದೆ.
ಪತ್ರಿಕಾ ಸ್ವಾತಂತ್ರ್ಯಕ್ಕೆ ದಕ್ಕೆ ತರುವುದಿಲ್ಲ ಎಂದಿದ್ದ ತಾಲಿಬಾನಿಗಳು ಇದೀಗ ಉಲ್ಟಾ ಹೊಡೆದಿದ್ದಾರೆ. 'ತಾಲಿಬಾನಿಗಳಿಗೆ ಹೆದರಬೇಡಿ. ಇಸ್ಲಾಮಿಕ್ ಆಡಳಿತಕ್ಕೆ ಯಾರೂ ಭಯಪಡುವ ಅಗತ್ಯವಿಲ್ಲ' ಎಂದು ಆಯಂಕರ್ ಮೂಲಕ ಬಲವಂತವಾಗಿ ಹೇಳಿಸಿದ್ದಾರೆ. ಇತ್ತೀಚಿಗೆ ಡಿಡಬ್ಲ್ಯು ನ್ಯೂಸ್ ಚಾನೆಲ್ನ ವರದಿಗಾರರನ್ನ ಹತ್ಯೆಗೈದಿದ್ದ ತಾಲಿಬಾನಿಗಳು, ತಮ್ಮ ವಿರುದ್ಧ ಸುದ್ದಿ ಮಾಡುವರನ್ನು ಗುಂಡಿಕ್ಕಿ ಕೊಲ್ಲಲು ಹವಣಿಸುತ್ತಿದ್ದಾರೆ.
ಶಾಂತಿ ನೆಲೆಸಿದ್ದ ಆಫ್ಘಾನ್ ನಾಡು ಆ.15ರಂದು ತಾಲಿಬಾನಿಗಳು ವಶಪಡಿಸಿಕೊಂಡಾಗಿನಿಂದ ಸಾವಿನ ಮನೆಯಾಗಿದೆ. ನಿತ್ಯ ಮದ್ದು-ಗುಂಡುಗಳ ಆರ್ಭಟದಿಂದ ಜನರು ಮೃತ್ಯುವಿನ ನಡುವೆಯೇ ಜೀವಿಸುತ್ತಿದ್ದಾರೆ. ತಾಲಿಬಾನಿಗಳಿಂದ ಪ್ರಾಣ ಉಳಿಸಿಕೊಳ್ಳಲು ಆಫ್ಘಾನ್ ತೊರೆಯಲು ಅಲ್ಲಿನ ಜನ ಕಾತರಿಸುತ್ತಿದ್ದಾರೆ.
