ರೋಗಿಗೆ ಪ್ಲೇಟ್ಲೆಟ್ಸ್ ಬದಲು ಮೂಸಂಬಿ ಜ್ಯೂಸ್ ಕೊಟ್ಟು ಸಾವು; ಈ ಪ್ರಕರಣದ ಬೆನ್ನಿಗೇ ಕರಾಳ ದಂಧೆ ಬಯಲು!
ನವದೆಹಲಿ: ರೋಗಿಯೊಬ್ಬರಿಗೆ ಪ್ಲೇಟ್ಲೆಟ್ಸ್ ಕೊಡುವ ಬದಲು ಮೂಸಂಬಿ ಜ್ಯೂಸ್ ಕೊಟ್ಟಿದ್ದರಿಂದ ಸಾವಿಗೀಡಾದ ಪ್ರಕರಣದ ಬೆನ್ನಿಗೇ ಕರಾಳ ದಂಧೆಯೊಂದು ಬಯಲಾಗಿದೆ. ಮಾತ್ರವಲ್ಲ, ಇದಕ್ಕೆ ಸಂಬಂಧಿಸಿದಂತೆ ಹತ್ತು ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಉತ್ತರ ಪ್ರದೇಶದ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಡೆಂಘೆಯಿಂದ ಬಳಲುತ್ತಿದ್ದ ರೋಗಿಯೊಬ್ಬರಿಗೆ ಪ್ಲೇಟ್ಲೆಟ್ಸ್ ಎಂದು ಹೇಳಿ ಮೂಸಂಬಿ ಜ್ಯೂಸ್ ದೇಹಕ್ಕೆ ಸೇರಿಸಿದ್ದರು ಎನ್ನಲಾಗಿದ್ದು, ಆ ರೋಗಿ ಸಾವಿಗೀಡಾಗಿದ್ದ ಪ್ರಕರಣ ನಡೆದಿದೆ. ಇದರ ಬೆನ್ನಿಗೆ ಮತ್ತೊಂದು ಆತಂಕದ ವಿಷಯ ಬಹಿರಂಗಗೊಂಡಿದೆ.
ನಕಲಿ ಪ್ಲೇಟ್ಲೆಟ್ ಮಾರಾಟದ ಆರೋಪದ ಹಿನ್ನೆಲೆಯಲ್ಲಿ ಉತ್ತರಪ್ರದೇಶದ ಪ್ರಯಾಗ್ರಾಜ್ನ ಪೊಲೀಸರು ಹತ್ತು ಮಂದಿಯನ್ನು ಬಂಧಿಸಿದ್ದು, ಅವರಿಂದ ಆ ಪ್ಯಾಕೆಟ್ಗಳನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಸ್ಪರ್ಶ ಹಾಗೂ ಬಣ್ಣ ಎರಡರಲ್ಲೂ ಈ ಬ್ಲಡ್ ಪ್ಲಾಸ್ಮಾ ಮೂಸಂಬಿ ಜ್ಯೂಸ್ಗೆ ಸಾಮೀಪ್ಯ ಹೊಂದಿರುವುದರಿಂದ ಅದನ್ನು ಪ್ಲೇಟ್ಲೆಟ್ ಎಂದು ಸುಳ್ಳು ಹೇಳಿ ಮಾರಾಟ ಮಾಡುವ ದಂಧೆಯೊಂದು ನಡೆಯುತ್ತಿದೆ ಎನ್ನಲಾಗಿದ್ದು, ಪೊಲೀಸರು ಈ ಕುರಿತು ಹೆಚ್ಚಿನ ತನಿಖೆಗೆ ಇಳಿದಿದ್ದಾರೆ.
