ಜಾರ್ಜ್‌ ಆಪ್ತರ ಎಂಬೆಸಿ ಗ್ರೂಪ್‌ ಸೇರಿ ಹಲವು ಕಂಪನಿಗಳ ಮೇಲೆ ಐಟಿ ದಾಳಿ, 400 ಸ್ಥಳಗಳಲ್ಲಿ ಹುಡುಕಾಟ

ಬೆಂಗಳೂರು: ಕರ್ನಾಟಕದ ಮಾಜಿ ಗೃಹ ಸಚಿವ, ಸರ್ವಜ್ಞನಗರ ಶಾಸಕ ಕೆ.ಜೆ.ಜಾರ್ಜ್‌ ಆಪ್ತ ಸಂಬಂಧ ಇಟ್ಟುಕೊಂಡಿರುವ ಎಂಬೆಸಿ ಗ್ರೂಪ್‌ನ ಬೆಂಗಳೂರು, ಮುಂಬಯಿನ ಕಚೇರಿಗಳ ಮೇಲೆ ಐಟಿ ಅಧಿಕಾರಿಗಳು ಬುಧವಾರ ಬೆಳ್ಳಂಬೆಳಗ್ಗೆ ದಾಳಿ ನಡೆಸಿದ್ದಾರೆ. ಆದಾಯ ತೆರಿಗೆ ಇಲಾಖೆಯು ದೇಶಾದ್ಯಂತ ಹಲವು ಕಂಪನಿಗಳ ಕಚೇರಿ, ಮಾಲೀಕರ ಮನೆ, ಅಧಿಕಾರಿಗಳ ಮನೆಗಳಲ್ಲಿ ಹುಡುಕಾಟ ನಡೆಸುತ್ತಿದೆ. ಮದ್ಯದ ದೊರೆಗಳು, ಉದ್ಯಮಿಗಳು ಹಾಗೂ ವಿವಿಧ ಕಂಪನಿಗಳಿಗೆ ಸೇರಿದ ಸುಮಾರು 400 ಸ್ಥಳಗಳಲ್ಲಿ ಬುಧವಾರ ಶೋಧ ಕಾರ್ಯಾಚರಣೆಯನ್ನು ಆರಂಭಿಸಿದೆ ಎಂದು ಮೂಲಗಳು ತಿಳಿಸಿವೆ. ಹರಿಯಾಣದ ಗುರುಗ್ರಾಮ, ಮುಂಬೈ, ದೆಹಲಿ, ಕರ್ನಾಟಕದ ಬೆಂಗಳೂರು ಸೇರಿದಂತೆ ಐದು ರಾಜ್ಯಗಳಲ್ಲಿ ಶೋಧ ಕಾರ್ಯಾಚರಣೆ ಭರದಿಂದ ಸಾಗಿದೆ. ಮುಂಬೈನಲ್ಲಿ, ಐಟಿ ತಂಡವು ಬಾಂದ್ರಾ ಕುರ್ಲಾ ಕಾಂಪ್ಲೆಕ್ಸ್‌ನಲ್ಲಿರುವ ಎಂಬಸಿ ಗ್ರೂಪ್‌ನ ಕಚೇರಿ ಮೇಲೆ ದಾಳಿ ನಡೆಸಿದ್ದು, ಯಾರಿಗೂ ಕಚೇರಿಯಿಂದ ಹೊರಹೋಗಲು ಅಥವಾ ಕಚೇರಿಗೆ ಪ್ರವೇಶಿಸಲು ಅವಕಾಶ ನೀಡುತ್ತಿಲ್ಲ. ಮುಂಬೈನ ಬಾಂದ್ರಾ-ಕುರ್ಲಾ ಕಾಂಪ್ಲೆಕ್ಸ್ (ಬಿಕೆಸಿ) ಪ್ರದೇಶದಲ್ಲಿರುವ ಇಂಡಿಯಾಬುಲ್ಸ್ ರಿಯಾಲ್ಟಿಯ ಆವರಣದಲ್ಲೂ ಹುಡುಕಾಡ ನಡೆಸುತ್ತಿದೆ. ಇತ್ತೀಚೆಗಷ್ಟೇ ಎಂಬೆಸೆ ಗ್ರೂಪ್‌ನೊಂದಿಗೆ ಇಂಡಿಯಾಬುಲ್ಸ್‌ ರಿಯಾಲ್ಟಿ ವಿಲೀನಗೊಂಡಿತ್ತು. ಬೆಂಗಳೂರಿನಲ್ಲಿ ಸದಾಶಿವ ನಗರದಲ್ಲಿರುವ ಎಂಬೆಸಿ ಆರ್ಕಿಡ್‌ ಹಾಗೂ ಗುರುಗ್ರಾಮದಲ್ಲಿರುವ ಕಚೇರಿಯ ಮೇಲೆಯೂ ದಾಳಿ ನಡೆಸಲಾಗಿದೆ. ಜತೆ ಕೆ.ಜೆ. ಜಾರ್ಜ್‌ ಅವಿನಾಭಾವ ಸಂಬಂಧ ಹೊಂದಿದ್ದು, ಹಲವು ಉದ್ಯಮಗಳಲ್ಲಿ ಎಂಬೆಸಿ ಗ್ರೂಪ್‌ ಮತ್ತು ಜಾರ್ಜ್‌ ಜತೆಯಾಗಿ ತೊಡಗಿಸಿಕೊಂಡಿದ್ದಾರೆ. ದಾಳಿಯ ವಿವರಗಳಿಗಾಗಿ ಕಾಯುತ್ತಿರುವಾಗಲೇ ಪ್ರತಿಕ್ರಿಯೆ ನೀಡಿರುವ ಎಂಬೆಸಿ ಗ್ರೂಪ್‌, ಇದು ವಾಡಿಕೆಯ ಆದಾಯ ತೆರಿಗೆ ಪರಿಶೀಲನೆ ಎಂದು ಸಮಜಾಯಿಷಿ ನೀಡಿದೆ. "ಎಂಬೆಸಿ ಗ್ರೂಪ್‌ ಯಾವಾಗಲೂ ಅನ್ವಯವಾಗುವ ಕಾನೂನುಗಳು ಮತ್ತು ನಿಯಮಗಳ ನಿಬಂಧನೆಗಳಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸುವುದನ್ನು ಮುಂದುವರಿಸುತ್ತದೆ. ಜತೆಗೆ ಕಾರ್ಪೊರೇಟ್ ಆಡಳಿತದ ಉನ್ನತ ಗುಣಮಟ್ಟವನ್ನು ನಿರ್ವಹಿಸುತ್ತದೆ. ನಾವು ಸಂಬಂಧಿತ ಇಲಾಖೆಗಳಿಗೆ ಸಂಪೂರ್ಣ ಸಹಕಾರ ನೀಡುತ್ತಿದ್ದೇವೆ. ವ್ಯವಹಾರವು ಎಂದಿನಂತೆ ಮುಂದುವರಿಯುತ್ತದೆ ಎಂದು ನಾವು ಭರವಸೆ ನೀಡುತ್ತೇವೆ,” ಎಂದು ರಿಯಲ್ ಎಸ್ಟೇಟ್ ಸಂಸ್ಥೆ ಹೇಳಿದೆ. ಗುರುಗ್ರಾಮ್‌ನಲ್ಲಿ ಮದ್ಯ ಮಾರಾಟ ಮಾಡುವ ಉದ್ಯಮಿಯೊಬ್ಬರ ಕಚೇರಿಯಲ್ಲಿಯೂ ಶೋಧ ಕಾರ್ಯಾಚರಣೆ ನಡೆಯುತ್ತಿದೆ. ದಾಳಿಗೆ ಒಳಗಾದವರೆಲ್ಲಾ ತೆರಿಗೆ ವಂಚನೆಯಲ್ಲಿ ಭಾಗಿಯಾಗಿದ್ದಾರೆ ಎಂದು ಆದಾಯ ತೆರಿಗೆ ಇಲಾಖೆಯು ಅನುಮಾನ ವ್ಯಕ್ತಪಡಿಸಿದ್ದು, ಈ ಹಿನ್ನೆಲೆಯಲ್ಲಿ ಶೋಧ ಕಾರ್ಯಾಚರಣೆಗೆ ಇಳಿದಿದೆ. ಈ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ನಿರೀಕ್ಷಿಸಲಾಗುತ್ತಿದೆ. ಮಾರ್ಚ್‌ನಿಂದ ಸರಣಿ ದಾಳಿ ಇತ್ತೀಚೆಗೆ ನಡೆಸುತ್ತಿರುವ ಮೊದಲ ದಾಳಿ ಇದಲ್ಲ. ಮಾರ್ಚ್‌ನಿಂದ ಒಂದಾದ ಮೇಲೊಂದು ದಾಳಿಯನ್ನು ಆದಾಯ ತೆರಿಗೆ ಇಲಾಖೆ ನಡೆಸುತ್ತಲೇ ಇದೆ. ಇದೀಗ ಜೂನ್‌ ಮೊದಲ ದಿನವೂ ಈ ರೀತಿಯ ದಾಳಿಗಳು ಮುಂದುವರಿದಿವೆ. ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.