ಶ್ರೀರಂಗಪಟ್ಟಣದ ಕಾವೇರಿ ಮಡಿಲಲ್ಲಿ ಚಂದ್ರವನದ ಬೆಳದಿಂಗಳಿಗೆ ಶತಕ ಸಂಭ್ರಮ..!

ಶಿವಮೂರ್ತಿ ಜುಪ್ತಿಮಠ : ಮಂಡ್ಯ ಜಿಲ್ಲೆ ಶ್ರೀರಂಗ ಪಟ್ಟಣದಲ್ಲಿರುವ ಚಂದ್ರವನ ಆಶ್ರಮದಲ್ಲಿ ಪ್ರತಿ ತಿಂಗಳು ನಡೆಯುವ ಬೆಳದಿಂಗಳ ಹುಣ್ಣಿಮೆಗೆ ಈಗ ನೂರೆಂಟರ ಸಂಭ್ರಮ. ಜಾತಿ, ಮತ, ಪಂಥಗಳನ್ನು ಮೀರಿ ಗಂಡು, ಹೆಣ್ಣು ಭೇದವಿಲ್ಲದೇ ಎಲ್ಲರೂ ಒಟ್ಟಿಗೆ ಕೂಡಿ ಕಾವೇರಿಗೆ ಆರತಿ ಮಾಡಿ, ಶ್ರೀಗಳಿಂದ ಕೈತುತ್ತು ಪಡೆಯುತ್ತ ಅವರೊಂದಿಗೆ ಪ್ರಸಾದ ಸ್ವೀಕರಿಸುವ ಈ ಕಾರ್ಯಕ್ರಮ 'ಪ್ರೀತಿಯ ಪಂಥ- ಪ್ರೀತಿಯ ಪಂಕ್ತಿ'. 1999ರ ಫೆಬ್ರವರಿಯಲ್ಲಿ ಪಾಂಡವಪುರ ತಾಲೂಕಿನ ಬೇಬಿ ಗ್ರಾಮದ ಶ್ರೀದುರ್ದಂಡೇಶ್ವರ ಮಹಂತ ಶಿವಯೋಗಿಗಳ ಮಠದಲ್ಲಿ 'ಬೆಳದಿಂಗಳ ' ಕಾರ್ಯಕ್ರಮ ಸರಳವಾಗಿ ತಾರಸಿ ಮೇಲೆ ಆರಂಭಗೊಂಡಿತು. 20-25 ಭಕ್ತರು ಮಾತ್ರ ಸೇರುತ್ತಿದ್ದರು. 2012ರ ಡಿಸೆಂಬರ್‌ ವೇಳೆಗೆ ಈ ಕಾರ‍್ಯಕ್ರಮ ಸ್ವಲ್ಪ ವಿಸ್ತಾರಗೊಂಡಿತು. ಬೇಬಿ ಮಠ, ಚಂದ್ರವನ ಆಶ್ರಮದ ಪೀಠಾಧಿಪತಿಗಳಾದ ಶ್ರೀ ತ್ರಿನೇತ್ರ ಮಹಂತ ಶಿವಯೋಗಿ ಸ್ವಾಮೀಜಿಗಳು ಕಾರ‍್ಯಕ್ರಮವನ್ನು ಶ್ರೀರಂಗ ಪಟ್ಟಣದ ಕಾವೇರಿ ತಟದಲ್ಲಿರುವ ಚಂದ್ರವನ ಆಶ್ರಮಕ್ಕೆ ಸ್ಥಳಾಂತರಿಸಿದರು. ಇಲ್ಲಿಗೆ ಬಂದ ಮೇಲೆ ಸಂಗೀತ ಕಛೇರಿ, ಕಾವೇರಿ ಆರತಿ ವಿಶೇಷವಾಗಿ ಆರಂಭಗೊಂಡವು. ಸೂರ್ಯನ ಕಿರಣಗಳು ಮನುಷ್ಯನ ಆರೋಗ್ಯಕ್ಕೆ ಎಷ್ಟು ಮುಖ್ಯವೋ ಚಂದ್ರನ ಕಾಂತಿಯೂ ಅಷ್ಟೇ ಪ್ರಮುಖ. ಪೂರ್ಣಚಂದ್ರನ ಕಾಂತಿ ಕಣ್ಣುಗಳಿಗೆ ಆನಂದವನ್ನು ನೀಡುತ್ತವೆ. ಜನರ ಮಾನಸಿಕ ಹಾಗೂ ದೈಹಿಕ ಆರೋಗ್ಯ ದೃಷ್ಟಿಯಿಂದ ಹುಣ್ಣಿಮೆ ಕಾರ‍್ಯಕ್ರಮ ಆಯೋಜಿಸಲಾಗುತ್ತಿದೆ. 'ಜನರ ಮನಸ್ಸು, ದೇಹ ಉಲ್ಲಾಸಗೊಳ್ಳುತ್ತಿರುವುದರಿಂದ, ಬರುವವರ ಸಂಖ್ಯೆ 300-400ಕ್ಕೆ ಹೆಚ್ಚಿದೆ. ಕಾವೇರಿ ನದಿಯ ಪೂರ್ವವಾಹಿನಿ ಆಗಿರುವುದರಿಂದ ಇದು ಶಕ್ತಿ ಕೇಂದ್ರ. ಸಂಗೀತ ಆಲಿಸುವುದು, ಇದಕ್ಕೆ ಕಳಶವಿಟ್ಟಂತೆ ಪಕ್ಕದಲ್ಲೇ ಹರಿಯುವ ನೀರಿನ ನಿನಾದ ಖುಷಿ ಕೊಡುತ್ತದೆ. ಇದರಿಂದ ಒತ್ತಡ ನಿವಾರಣೆಯಾಗುತ್ತದೆ. ಅನವಶ್ಯಕ ಚಿಂತನೆಗಳ ಭಾರ ಇಳಿಯುತ್ತದೆ. ಹೀಗಾಗಿ ಬಹಳಷ್ಟು ಜನರು ಸ್ವಯಂ ಪ್ರೇರಿತರಾಗಿ ಆಗಮಿಸುತ್ತಾರೆ. ಬೆಂಗಳೂರು, ಮೈಸೂರಷ್ಟೇ ಅಲ್ಲ, ಬೆಳಗಾವಿ, ಹಾವೇರಿ ಸೇರಿದಂತೆ ಉತ್ತರ ಕರ್ನಾಟಕದ ಜಿಲ್ಲೆ, ಹೊರ ರಾಜ್ಯಗಳಿಂದಲೂ ಜನರು ಆಗಮಿಸುತ್ತಾರೆ' ಎನ್ನುತ್ತಾರೆ ತ್ರಿನೇತ್ರ ಮಹಂತ ಶ್ರೀ. ಜರ್ಮನ್‌ನಿಂದ ಆಗಮಿಸಿದ ಕಲಾವಿದರು ಕೂಡ ಇಲ್ಲಿ ಸಂಗೀತ ಸುಧೆ ಉಣ ಬಡಿಸಿದ್ದಾರೆ. ನಾಡಿನ ಕಲಾವಿದರಾದ ಗುರುರಾಜ ಹೊಸಕೋಟೆ, ಶಶಿಧರ ಕೋಟೆ, ಗಂಗೂಬಾಯಿ ಹಾನಗಲ್‌ ಮೊಮ್ಮಗಳು ವೈಷ್ಣವಿ ಸೇರಿದಂತೆ ಬಹಳಷ್ಟು ಮಂದಿ ಬೆಳದಿಂಗಳ ಸಂಗೀತ ಕಾರ್ಯಕ್ರಮದ ಮೂಲಕ ಜನರನ್ನು ರಂಜಿಸಿದ್ದಾರೆ. ಅನ್ನಪೂರ್ಣೇಶ್ವರಿ ಜಪ ಮಾಡುತ್ತ, ಚಂದ್ರ ಮತ್ತು ಕಾವೇರಿ ಮಾತೆ, ಇಷ್ಟಲಿಂಗ ದೇವರಿಗೆ ಬುತ್ತಿಯನ್ನು ಎಡೆ ಮಾಡಿ, ಪ್ರತಿಯೊಬ್ಬರಿಗೂ ನೀಡಲಾಗುತ್ತದೆ. ಒಂದೊಂದು ತುತ್ತಿಗೂ ಮಂತ್ರ ಹೇಳಿ ಶ್ರೀಗಳು ಕೈ ತುತ್ತು ಕೊಡುತ್ತಾರೆ. 'ಗುರುಗಳು ಕೈ ತುತ್ತು ಕೊಟ್ಟು, ಜೊತೆಯಲ್ಲಿ ಕುಳಿತು ಊಟ ಮಾಡುವ ಸಂಪ್ರದಾಯ ಕರ್ನಾಟಕದ ಎಲ್ಲೂ ಇಲ್ಲ. ಇದೊಂದು ವಿನೂತನ ಪರಿಕಲ್ಪನೆ. ಸಮಾನತೆಯಿಂದ ಕೂಡಿ ಬಾಳುವ ಮನಸ್ಸು ಪ್ರತಿಯೊಬ್ಬರದಾಗಬೇಕು ಎಂಬ ಸಂದೇಶವನ್ನು ಸಾರಲಾಗುತ್ತಿದೆ' ಎಂಬುದು ತ್ರಿನೇತ್ರ ಶ್ರೀಗಳ ಅಭಿಮತ.