ಬಿಜೆಪಿ ಹತ್ತಿಕ್ಕಲು ವಿಫಲ-ಆಜಾದ್ ಪಕ್ಷಕ್ಕೆ ಹಿನ್ನಡೆ?
ಶ್ರೀನಗರ: ಗುಲಾಂ ನಬಿ ಆಜಾದ್ ನೇತೃತ್ವದ ಡೆಮಾಕ್ರಟಿಕ್ ಆಜಾದ್ ಪಕ್ಷದ (ಡಿಎಪಿ) 17 ನಾಯಕರು ಕಾಂಗ್ರೆಸ್‌ಗೆ ಮರಳಿರುವುದರಿಂದ ನಾಲ್ಕು ತಿಂಗಳ ಹಿಂದೆಯಷ್ಟೇ ಸ್ಥಾಪಿಸಿದ ಹೊಸ ಪಕ್ಷದ ಭವಿಷ್ಯ ಅಪಾಯಕ್ಕೆ ಸಿಲುಕಿದೆ. ಬಿಜೆಪಿಯನ್ನು ಹತ್ತಿಕ್ಕಲು ಪಕ್ಷ ವಿಫಲವಾಗಿರುವುದರಿಂದಲೇ ಈ ಬೆಳವಣಿಗೆ ನಡೆದಿದೆ ಎಂದು ರಾಜಕೀಯ ವಿಶ್ಲೇಷಕರು ಅಂದಾಜಿಸಿದ್ದಾರೆ.
ಮಾಜಿ ಉಪಮುಖ್ಯಮಂತ್ರಿ, ಇಬ್ಬರು ಮಾಜಿ ಶಾಸಕರು ಸೇರಿದಂತೆ ಆಜಾದ್ ಅವರ ದೀರ್ಘಕಾಲದ ನಿಷ್ಠಾವಂತ ನಾಯಕರು, ಕಾಂಗ್ರೆಸ್ ತೊರೆಯುವ ನಿರ್ಧಾರವನ್ನು ವ್ಯಕ್ತಿಯ ಸ್ನೇಹ ಆಧಾರದ ಮೇಲೆ ಮಾಡಿದ ಪ್ರಮಾದ ಎಂದು ಹೇಳಿದ್ದರು. ಪಕ್ಷಕ್ಕೆ ಮರಳಿದ ನಂತರ ಅವರು ಕ್ಷಮೆಯಾಚಿಸಿದ್ದರು.
ರಾಜಕೀಯ ಪಕ್ಷವಾಗಿ ಚುನಾವಣಾ ಆಯೋಗದಲ್ಲಿ (ಇಸಿ) ಇನ್ನೂ ನೋಂದಣಿಯಾಗದ ಡಿಎಪಿಯ ವಿಘಟನೆಗೆ ಹಲವಾರು ಅಂಶಗಳು ಕಾರಣ ಎಂದು ಹೇಳಲಾಗುತ್ತಿದೆ. ಐದು ದಶಕಗಳ ನಂತರ ಆಜಾದ್ ಅವರು ಕಾಂಗ್ರೆಸ್ ತೊರೆದಾಗ ಅವರೊಂದಿಗೆ ಹೋದ ಹೆಚ್ಚಿನ ನಾಯಕರು ಮತ್ತು ಕಾರ್ಯಕರ್ತರು ಹಳೆಯ ಪಕ್ಷಕ್ಕೆ ಸೇರಿದವರಾಗಿದ್ದರು.
ಆಜಾದ್ ಅವರು ತಮ್ಮ ಪಕ್ಷಕ್ಕೆ ಸಾರ್ವಜನಿಕರ ಬೆಂಬಲ ಪಡೆಯುವಲ್ಲಿ ವಿಫಲವಾದ ಕಾರಣ ಡಿಎಪಿ ಆರಂಭಿಕ ಉತ್ಸಾಹ ಕಣ್ಮರೆಯಾಗತೊಡಗಿದೆ.
ಈ ಹಿಂದೆ (2005-2008) ಜಮ್ಮು ಮತ್ತು ಕಾಶ್ಮೀರದ ಮುಖ್ಯಮಂತ್ರಿಯಾಗಿದ್ದ ಆಜಾದ್ ಅವರು ಬಿಜೆಪಿಗೆ ಪರ್ಯಾಯವಾಗಿ ಹೊರಹೊಮ್ಮಬಹುದು ಹಾಗೂ ಕೇಂದ್ರಾಡಳಿತ ಪ್ರದೇಶದ ಹೆಪ್ಪುಗಟ್ಟಿದ ರಾಜಕೀಯದಲ್ಲಿ ಯಾವುದೇ ಬದಲಾವಣೆ ತರಲು ಜನರನ್ನು ಪ್ರೇರೇಪಿಸುವಲ್ಲಿ ವಿಫಲರಾಗಿದ್ದಾರೆ ಎಂದು ರಾಜಕೀಯ ವೀಕ್ಷಕರು ಹೇಳಿದ್ದಾರೆ.
'ಕಾಶ್ಮೀರ ಮಾತ್ರವಲ್ಲದೆ, ಜಮ್ಮುವಿನ ಮುಸ್ಲಿಂ ಪ್ರದೇಶಗಳ ಜನರು ಸಹ ಡಿಎಪಿ ಕೇವಲ ಜಾತ್ಯತೀತ ಮತಗಳನ್ನು ವಿಭಜಿಸುತ್ತದೆ ಮತ್ತು ಬಿಜೆಪಿ ಕೈ ಬಲಪಡಿಸುತ್ತದೆ ಎಂದು ಅರಿತುಕೊಂಡಿದ್ದರು. 370 ನೇ ವಿಧಿ ಪುನಃ ಸ್ಥಾಪಿಸಲು ಸಾಧ್ಯವಿಲ್ಲ ಎಂಬ ಆಜಾದ್ ಅವರ ಹೇಳಿಕೆಯು ಅವರನ್ನು ಬಿಜೆಪಿಯ 'ಬಿ-ಟೀಮ್' ಎಂಬ ಹಣೆಪಟ್ಟಿ ಕಟ್ಟಲು ಅವರ ವಿರೋಧಿಗಳಿಗೆ ಅಸ್ತ್ರ ನೀಡಿದಂತಾಯಿತು ಎಂದು ರಾಜಕೀಯ ವಿಶ್ಲೇಷಕ ರಮೀಜ್ ಮಖ್ದೂಮಿ ತಿಳಿಸಿದರು.
