ಬಡವರ ಬಾದಾಮಿ ನೆಲಗಡಲೆ ಬೆಳೆದ ಕೋಲಾರದ ರೈತ: 1.13 ಎಕರೆಯಲ್ಲಿ 4 ಟನ್ ಇಳುವರಿ!

ಕೋಲಾರ: ಜಿಲ್ಲೆಯ ಬಹುತೇಕ ರೈತರು ಹೆಚ್ಚಾಗಿ ತರಕಾರಿ, ಹೂವು, ಹಣ್ಣುಗಳನ್ನು ಬೆಳೆಯುವುದರಲ್ಲಿ ನಿಸ್ಸೀಮರು. ಆದರೆ ರೈತರಿಗೆ ಕೃಷಿಯಲ್ಲಿ ಲಾಭಕ್ಕಿಂತ ನಷ್ಟ ಆಗುವುದೇ ಹೆಚ್ಚು. ಆದರೂ ಛಲ ಬಿಡದ ರೈತರು ಕೃಷಿಯಲ್ಲಿ ಹೊಸ ಹೊಸ ಪ್ರಯೋಗಗಳಿಗೆ ಮುಂದಾಗುತ್ತಾರೆ. ಅದರಂತೆ ಇಲ್ಲೊಬ್ಬ ಸಾವಯವ ಕೃಷಿಯ ಮೂಲಕ ಬಡವರ ಬಾದಾಮಿ ನೆಲಗಡಲೆಯನ್ನು ಬೆಳೆದಿದ್ದಾನೆ. ಬಡವರ ಬಾದಾಮಿ ಬೆಳೆದು ಯಶಸ್ವಿಯಾದ ರೈತ: ಕೋಲಾರ ತಾಲೂಕಿನ ಸುಗಟೂರು ಗ್ರಾಮದ ರೈತ ನಾರಾಯಣಸ್ವಾಮಿ ಅವರು ಅವರ ತಂದೆಯವರ ಕಾಲದಿಂದಲೂ ಕೃಷಿಯನ್ನೇ ನಂಬಿ ಕೃಷಿಯಿಂದಲೇ ಜೀವನ ಸಾಗಿಸುತ್ತಿದ್ದಾರೆ. ಹಲವು ಬಾರಿ ವಿವಿಧ ಬೆಳೆಗಳನ್ನು ಬೆಳೆದು ಮಾರುಕಟ್ಟೆಯಲ್ಲಿ ಬೆಲೆ ಇಲ್ಲದೆ ಕೈಸುಟ್ಟುಕೊಂಡಿದ್ದಾರೆ. ಹಾಗಾಗಿ ಈ ಬಾರಿ ಹೊಸ ಪ್ರಯೋಗಕ್ಕೆ ಮುಂದಾದ ರೈತ ನಾರಾಯಣಸ್ವಾಮಿ, ಪರಿಚಯಸ್ಥರ ಸಲಹೆ ಮೇರೆಗೆ ಮೊದಲ ಬಾರಿಗೆ ಕದಿರಿ ಲೇಪಾಕ್ಷಿ ಕೆ-1812 ಎಂಬ ಹೊಸ ತಳಿಯ ಕಡೆಲೆಕಾಯಿಯನ್ನು ಬಿತ್ತನೆ ಮಾಡಿದ್ದಾನೆ. ಈ ನೆಲಗಡಲೆಯು ನಿರೀಕ್ಷೆಗೂ ಮೀರಿ ಇಳುವರಿ ಬಂದಿದ್ದು ರೈತರು ಸಂತಸ ವ್ಯಕ್ತಪಡಿಸಿದ್ದಾರೆ. ಪ್ರತಿ ಗಿಡಕ್ಕೂ 150 ರಿಂದ 200 ಕಾಯಿ ಇಳುವರಿ: ಮಾವು, ಟೊಮ್ಯಾಟೊ ಸೇರಿದಂತೆ ವಿವಿಧ ರೀತಿಯ ತರಕಾರಿಗಳನ್ನು ಹೆಚ್ಚಾಗಿ ಬೆಳೆಯುವ ಕೋಲಾರ ಜಿಲ್ಲೆಯ ಭಾಗದಲ್ಲಿ ನೆಲಗಡಲೆಯನ್ನು ಬೆಳೆಯುವುದು ತುಂಬಾ ಕಡಿಮೆ. ಕಡಲೆಕಾಯಿಯನ್ನು 10 ರಿಂದ 15 ಪರ್ಸೆಂಟ್ ಮಾತ್ರ ಜಿಲ್ಲೆಯ ಜನರು ಬೆಳೆಯುತ್ತಾರೆ. ನೆಲಗಡಲೆಯಲ್ಲಿ ವಿವಿಧ ರೀತಿಯ ತಳಿಗಳು ಇದ್ದರೂ, ರೈತ ನಾರಾಯಣಸ್ವಾಮಿ ಮೊದಲ ಬಾರಿಗೆ ಕದಿರಿ ಲೇಪಾಕ್ಷಿ ಕೆ-1812 ಎಂಬ ತಳಿಯನ್ನು ಬೆಳೆದಿದ್ದಾರೆ. ಈ ತಳಿಯು ಆಂಧ್ರಪ್ರದೇಶದ ಅನಂತಪುರ ಜಿಲ್ಲೆಯ ಕದಿರಿ ಭಾಗದಲ್ಲಿ ತುಂಬಾ ಪ್ರಸಿದ್ಧಿಯನ್ನು ಪಡೆದಿದೆ. ಈ ತಳಿಯ ವಿಶೇಷ ಏನೆಂದರೆ ಪ್ರತಿ ಗಿಡಕ್ಕೂ 150 ರಿಂದ 200 ಕಾಯಿ ಇಳುವರಿ ಬರುತ್ತದೆ. ಬೇರೆ ತಳಿಗಳಿಗೂ ಹಾಗೂ ಈ ತಳಿಗೂ ವ್ಯತ್ಯಾಸ ನೋಡಿದರೆ ಕದಿರಿ ಲೇಪಾಕ್ಷಿಯಲ್ಲಿ ಮೂರು-ನಾಲ್ಕು ಪಟ್ಟು ಫಸಲು ಅಧಿಕವಾಗುತ್ತದೆ. 1.13 ಎಕರೆಯಲ್ಲಿ 4 ಟನ್ ಕಡಲೆಕಾಯಿ ಇಳುವರಿ: ಇನ್ನು ಇತರೆ ಬೆಳೆಗಳಿಗೆ ಹೋಲಿಸಿದರೆ ಕಡಲೆಕಾಯಿ ಬೆಳೆಯನ್ನು ಬೆಳೆಯುವುದು ತುಂಬಾ ಸುಲಭವಾಗಿದೆ. ನೆಲಗಡಲೆಯನ್ನು ಬಿತ್ತನೆ ಮಾಡಿದ 110 ರಿಂದ 120 ದಿ‌ನಗಳಲ್ಲಿ ಇಳುವರಿ ಬರುತ್ತದೆ. ಅಲ್ಲದೆ, ಇತರೆ ಕಡಲೆಕಾಯಿ ಬೆಳೆಗಳಿಗೆ ಹೋಲಿಸಿದರೆ ಕದಿರಿ ಲೇಪಾಕ್ಷಿ ತಳಿಗೆ ರೋಗಬಾಧೆ ತಗುಲುವುದು ತುಂಬಾ ಕಡಿಮೆ. ಈ ತಳಿಯಲ್ಲಿ ಪ್ರತಿ ಗಿಡಕ್ಕೂ 150 ರಿಂದ 200 ಕಾಯಿಗಳನ್ನು ಬಿಡುವುದಲ್ಲದೆ, ಕಾಯಿಗಳೂ ಸಹ ತುಂಬಾ ಗಟ್ಟಿಯಾದ ಬೀಜದಿಂದ ಕೂಡಿರುತ್ತದೆ. ಬಿತ್ತನೆ ಮಾಡಿದ ಆರಂಭದಿಂದಲೂ ಕೂಲಿಕಾರರ ಅವಶ್ಯಕತೆ ಹೆಚ್ಚಾಗಿ ಇರುವುದಿಲ್ಲ. ಆದರೆ ಕಟಾವಿನ ಸಮಯದಲ್ಲಿ ಗಿಡದ ತುಂಬಾ ಕಾಯಿ ಇರುವ ಕಾರಣ ಕೂಲಿಕಾರರ ಅವಶ್ಯಕತೆ ಇರುತ್ತದೆ. 1.13 ಎಕರೆಯಲ್ಲಿ ನೆಲಗಡಲೆಯನ್ನು ಬೆಳೆದಿದ್ದು, ಸುಮಾರು 4 ಟನ್ ಇಳುವರಿ ಬಂದಿದೆ. ಸದ್ಯ ಕೋಲಾರ ಮಾರುಕಟ್ಟೆಯಲ್ಲಿ 50 ಕೆಜಿ ಮೂಟೆಯ ಬೆಲೆ 2 ಸಾವಿರ ರೂಪಾಯಿ ಹೋಗುತ್ತಿದೆ. ಬೇರೆ ತಳಿಯ ನೆಲಗಡಲೆಗಿಂತ ಕದಿರಿ ಲೇಪಾಕ್ಷಿ ತಳಿಯು ರೈತರಿಗೆ ತುಂಬಾ ಲಾಭದಾಯಕವಾಗಿದೆ ಎಂದು ರೈತ ನಾರಾಯಣಸ್ವಾಮಿ ಹರ್ಷ ವ್ಯಕ್ತಪಡಿಸಿದ್ದಾರೆ.